قصيدة جديدة للشاعر العربي المصري الشعبي أحمد فؤاد نجم
"بلد الميت مليون حرامي"
إزاي أحبك يا بلدي و أنتي مش حباني
إزاي أعيش و أموت و أندفن في أرض رفضاني
بنام و أحلم ببكرة ألاقى بكرة زود أحزاني
آه يا بلد لو بايدي كنت أهدك و ابنيكي من تاني
بيقولك تعديل دستوري أحنا عايزين تعديل إنساني
كل إنجازات البلد أنفاق و كباري
بلد بتموت و شعب في حالة سكوت و كأنها لعبة أتاري
من كتر الظلم و الضلمة بقول يا ريت أيام الملك و الإنجليز ترجع تاني
آه يا بلد مليت بحبك الدفاتر مع العلم أنك قتلاني
مين اللي قال إن عبارة السلام غرقت
و مين اللي قال أن ممدوح إسماعيل قاتل و جاني
اللي غرقت مصر و اللي غرق ما بيطلعش حي تاني
هو يطلع من صالة كبار الزوار و أنا اتحبس في سجن المطار و اتعرض على البحث الجنائي
أنا اللي من صغري اخترتك سكتي أتريها سكة أحزاني
أنا اللي من صغري اخترتك كلمتي ألاقيكي مقيداني
آه يا بلد نفسي قبل ما أموت ألاقي زمانك و زماني
إتغربت أكتر من سبع سنين و رجعت لاقيت الغربه هنا شكل تاني
بلد بتعاني المعاني بكياني و أنا أملي أحس بكياني
عشرين سنة مخلص محبوس بين جدران دكاني
نفسي أعيش من غير ما أنافق السلطان و السلطاني
نفسي أعيش من غير ما أنافق و لا حتى أبويا اللي رباني
بكره نتحاسبو على السكوت و على العيشة العمياني
إبني مكملش سنتين نايم جنب مني بيشد في شعري و يحط صبعه في وداني
و يضربني بالقلم و لسان حاله بيقول ليه يابا خلفت تاني
و أنا في سري باقول ياريتك يا أحمد يابني ياباني إبن ياباني
مع إن وجودك في الدنيا عمل فيا و خلاني
أحب البلد و أهد جدران دكاني
شيخ الأزهر بيقول المعارضة حرام
و أنا نفسي أعرف إيه الحلال في بلد الميت مليون حرامي
شرفت يا نيكسون بابا
يابتاع الوتر جيت
عملوا لك قيمة وسيما
سلاطين الفول والزيت
فرشوا لك أوسع سكة
من راس التين على مكة
وهناك تنفذ على عكا
ويقولوا عليك حجيت
ما هو مولد ساير داير
شيلاه يا صحاب الييت
جواسيسك يوم تشريفك
عملولك دقة وذار
وبواقي الزفة عناكب
زاحفين على حسب الصيت
ما هو مولد ساير داير
شيلاه يا صحاب البيت
عزموك فقالوا تعالى
تاكل بمبون وهريسة
امت انت لانك مهيف
صدقت ان احنا فريسة
طبيت لحقوك بالزفة
يا عريس الغفلة يا خفة
هات وشك خذلك تفه
شوبش من صاحب البيت
واهو مولد ساير داير
شيلاه يا صحاب البيت
خد منى كلام يبقالك
ولو انك مش حتعيش
لاحجول اهلا ولا سهلا
ولاتيجي ولا ماتجيش
ليه ليه؟؟
بيقولوا اللحم المصري
ماطرح مابيسري بيهري
وده من تأثيرالكشرى
والفول والسوس ابو زيت
واهو مولد ساير داير
شيلاه ياسى صحاب البيت
تعليقات